糊塗半桶師

• 演唱：郭大誠

糊塗半桶師
糊塗半桶師
工夫低路通人知
糊塗半桶師
糊塗半桶師
糊里糊塗真可愛
欲學裁縫
做褲裂西西
欲學總舖
火雞毋敢刣
欲學理髮師
吹風吹袂在
欲學挽喙齒
去挽甲落下頦
糊里糊塗也可愛
半桶工夫
予恁笑咍咍
↓↓(口白)---(口白)---(口白)↓↓
若講起我少年時
實在真𠢕反變
講講咧
聽好搬咧一齣戲
工夫學無夠在
就去佮人
做彼號裁縫師
做一套奸臣仔服
予人穿去上舞臺
穿一下
褲底煞裂西西
我毋才走去
做彼號總舖師
頭一工 阮師傅
就掠一隻美國火雞
欲予我刣
我煞驚甲流目屎
阮師傅嫌我
膽頭無夠在
講叫我著轉去
學學咧
才閣來
我想想咧乎
就來去學搬戲
較實在
猶毋過導演的真厲害
伊講我
若是欲做奸臣仔
是無夠歹
若欲做小生
是欠人才
抑若欲做三花
是小丑仔激袂來
算算咧
攑旗棍仔是上合臺
好呶 攑旗棍仔
就攑旗棍仔啊
猶毋過真歹運
一下上舞臺
就去拄著奸臣仔
真正歹
原來伊就是頂一日仔
予我共做褲裂西西
伊永遠都真憤慨喔
就按呢
在舞臺頂
假戲真做
攑刀欲共我刣
害我驚一下
趕緊跳落臺
啊按呢
導演的氣甲大聲哀
罵我不應該
伸手欲共我揌
我就按呢
走去欲做牙齒師
若講做牙齒的醫生啊
我上愛
第一个人客
是有錢人的太太
伊講金喙齒欲換規排
叫我舊喙齒共挽起來
我挽啊挽
挽一下
煞落下頦
一塊牌匾
煞共我黜黜落來
我煞著愛改途
就按呢去做彼號理髮師
有一个少年的
講伊今仔日
欲做新囝婿
叫我頭鬃著愛
共伊吹甲較可愛
猶毋過
吹風機
火傷強
我毋知
共吹一下
規粒頭殼
煞做火災
彼頭鬃是燒甲
親像豆菜
少年的按呢
大聲細聲哀
看欲叫伊
如何去娶太太
後來乎
只好規套頭鬃
著愛剪落來
留一粒和尚頭
才去做新囝婿
唉 我的頭腦
都無比別人較䆀
因何做事攏會失敗
到尾仔我才知
就是因為
工夫學無夠在啊
就欲佮人
發大財做大師
毋才會予人笑講
是一个糊塗的半桶師
↑↑(口白)---(口白)---(口白)↑↑
糊塗半桶師
糊塗半桶師
工夫低路通人知
糊塗半桶師
糊塗半桶師
糊里糊塗真可愛
欲學裁縫
做褲裂西西
欲學總舖
火雞毋敢刣
欲學理髮師
吹風吹袂在
欲學挽喙齒
去挽甲落下頦
糊里糊塗也可愛
半桶工夫
予恁笑咍咍